FRANÇESKA TOLOT

Gözəllik sahəsində bu ad hər kəsə tanışdır. Mahir bir vizaj ustasının xidmət siyahısında – “Vogue”dan tutmuş “Rolling Stone”a qədər ən nüfuzlu jurnalların üz qapaqları, filmlərdən və musiqi kliplərindən ən tanınmış obrazlar, nüfuzlu Lucie Award mükafatı yer alır... Bu yaxında Françeskanın nailiyyətlərinin siyahısına biri daha əlavə olundu -  ona makiyaj üzrə quru olaraq Moskvada ilk M.A.C Pro master klassını keçirməyi etibar etdilər. O, bu master klassda One Woman 100 Faces bestsellerindən bir neçə əsas obrazı yenidən yaradaraq, peşənin incəlikləri və gözəllik sənayesinin gələcəyi haqqındakı fikirlərini bölüşüb.   

screen_shot_2017-04-04_at_13.47.13

Keçmiş və Gələcək arasında

İtalyan əsilli Françeska hələ uşaq vaxtlarında rəsm çəkmək həvəsi ilə dolu idi, yeniyetmə yaşlarında isə Renessans dövrünün yaradıcılığı ilə ilhamlanırdı. Onun rənglərə qarşı incə hissiyatı və rəssamlıq bacarığının olması  işlərini zərif sənət əsərləri ilə müqayisə etməyə zəmanət verirdi. Françeska etiraf edir ki, əgər vizajist olmağı seçməsəydi, restavrasiya sənətini öyrənərdi.     

- Əslində, mən indi də müəyyən dərəcədə bu işlə məşğulam. Obraz yaratdığım zaman çox vaxt kosmetika vasitəsilə tatu və ya ləkələri örtmək lazım olur... İstədiyim nəticəni əldə etdiyimdə, mən məmnunluq hissi keçirirəm. Bəli, bu da bir növ restavrasiya işidir.   

Həqiqətən də, bu günədək Françeska sənətə qırılmaz iplə bağlıdır. O, ilham axtarışında olarkən tez-tez arxivlərə baş çəkir və müasir rəssamların fəaliyyətini  izləməyi unutmur. Hesab edir ki, uğur əldə etmək istəyən hər bir vizajist üçün bu vacib şərtdir. Artıq bir neçə onilliklərdir ki, Françeskanı ilhamlandıran, lakin heç vaxt bənzəməyə çalışmadığı rəssamlardan biri - Serj Lyutandır: -  O, çox xüsusi bir şəxsiyyətdir və ona o qədər hörmətim var ki, mən heç vaxt maestronu təqlid etməyə cəhd etməzdim.   

Defisit inkişafa aparan yol kimi

Françeska artıq 30 ildən çoxdur ki, bu sahədədir. Gözəllik sənayesi tarixi sözün əsl mənasıyla onun gözləri qarşısında inkişaf edib. Hər şey 80-ci illərdə başladı - Gözəl və sağlam görünüş dəbi hər kəsdə  yaşlanmağa qarşı yeni - liposomlu, keramidalı və  kollagenli kosmetik məhsullara ehtiyac yaratdığı, kosmetika ilə tibbin arasında sıx əlaqə yarandığı və plastik cərrahiyyənin populyarlığı 63%-ə qədər artdığı bir zamanda. Gözəllik markalarının sayı getdikcə çoxalırdı, onlarla yanaşı müxtəlif məqsədli və xüsusiyyətli məhsulların sayı da artmaqda idi. Sadəcə tək bir brendə sadiq qalmaq inancı artıq bitmişdir. Sadələşməyi yalnız vizajistlər deyil, hətta cəlbedici və müasir qalmaq üçün hər cür hiylələrə əl ətan modapərəst qadınlar da dəstəklədi. Françeska, ilk dönüş  nöqtəsi olaraq M.A.C şirkətinin təbiiliyə maksimal dərəcədə yaxın olan tonlaşdırıcı tərkiblərinin peyda olmasını xatırlayır. O vaxta qədər bütün bənzər vasitələr çəhrayı və ya bozarmış piqmentlərdən ibarət idi. Buna görə də, vizajist hazır məhsulun bazarda olmamasını kompensasiya etmək üçün tonlaşdırıcı vasitələri sarı və ya narıncı göz kölgəsi ilə qarışdırmaq məcburiyyətində olurdu - bu da onun sehirbazlığının bir hissəsi idi .... Dünən və bu gün müvəffəqiyyət dalğasında olan Françeska, iyirmi il bundan əvvəl vizajistlərin şəxsi eksperimentləri aparmaq üçün daha çox geniş imkanları olduğuna əmindir:    

- Ehtiyac olduqda mən göy, qırmızı və ağ teksturanı birləşdirərək öz individual pomada rəngimi yarada bilirdim. Bunu başqa heç bir vizajist təkrarlaya bilmirdi. Bu gün sənayedəki vəziyyət bir az başqadır: istənilən sayda və çalarda hər növ vasitələri əldə etmək imkanı biz rəssamları müəyyən dərəcədə qabiliyyətimizi nümayiş etdirməkdən məhrum edir. Buna baxmayaraq, bunun bizim həyatımızı olduqca asanlaşdırdığını da etiraf etməliyik.

Heç vaxt "Heç vaxt" demə

Françeska öz adına makiyaj xətti yaratmağı düşünürmü? Vizajist bu suala təəssüf hissi keçirərək cavab verir.

- Bir vaxtlar mən özümə aid bir şey yaratmaq istəyirdim. Sonra planlar dəyişirdi, başqa təkliflər alırdım... Bu gün heyfislənirəmmi? Bəli. Çünkü o vaxtlar heç bir vizajistin öz adını daşıyan bir məhsulu olmayıb. Bu məni narahat edirmi? Yox. Bu fikir məndə yalnız yeni rənglərə və yeni teksturaya ehtiyac olduğunda yaranırdı. Bu gün, bu lazım deyil. Məni düz başa düşün: nə isə yeni bir şey üçün hər zaman geniş məkan mövcuddur, mən sabah səhər oyanıb və o anda "nə isə"ni yaratmağa qərar verə bilərəm. Ona görə də, heç vaxt "heç vaxt" deməməyə üstünlük verirəm....

Bir çox peşəkar cəhətlərinin olmasına baxmayaraq, Françeskanın cavabları onun son dərəcə təvazökar olduğunu göstərir:  

- Adıma gəldikdə isə, mən bunu özünübəyənmişliyin simvoluna çevirməyi düşünmürdüm. Əgər o vaxtlar mən makiyaj kolleksiyası yaratsaydım heç vaxt onu öz adımla adlandırmazdım! 

screen_shot_2017-04-04_at_13.46.58

Gündəlik həyat  üçün makiyaj

Müasir gözəllik sənayesi nədir? Bu haqda fikir əldə etmək üçün Instagrama daxil olaraq saysız-hesabsız beauty-bloggerin arasından birini tapmaq kifayyətdir. Bu gün məhz onlar bu sənayeni formalaşdırırlar: gözəllik sahəsi nəinki onların fikrini  nəzərə alır - həm də özü onlara uyğunlaşır.

Instagramın - konturing, strobing, baking, rəng korreksiyası trendləri izləyiciləri konsiler, korrektor və highlighter üçün, sözün əsl mənasında, növbəyə düzülməyə məcbur edir, amma Françeska, demək olar ki, kosmetikadan heç istifadə etmir. O, sadəcə tuşla kifayətlənir, öz üzlərini eksperimentlər üçün molbert hesab edən  Instagram qəhrəman-qadınları onu təəccübləndirir.

- Belə axmaq görünməmək üçün, sadəcə sağlam düşüncəni işə salmaq lazımdır. Bu insanlar üzlərinə bir neçə rəngləri eyni zamanda sürürlər, sonra isə həmin rəngləri qarışdırırlar. Nəticəni isə biz sizinlə birlikdə görürük. Bu, Instagramda qüsursuz görünə bilər, lakin real həyatda belə makiyajın yeri yoxdur. Az miqdarda keyfiyyətli məhsullardan istifadə edərək, təbii görünüşü vurğulamaq kifayətdir.

Bəs sonra?

Dünya bir yerdə dayanmır. Gözəllik dünyası da arxasına baxmadan və nəfəs almadan var gücü ilə bütün dövrlərdə sürətlə irəliləyir. İrəli - dünən heç kimin xəyal belə edə bilmədiyi yeni inqilabi kəşflərə!... 

Françeska bu mövzuda marağını gizlətmir. Yəqin, bizim bir çoxumuz kimi o da heç olmasa gözünün ucuyla belə olsa bu sahədə bizi nə kimi dəyişikliklərin gözlədiyini görmək üçün gələcəyə göz gəzdirmək istərdi: - Ümid edirəm ki, biz inkişaf edəcəyik,  geriyə addımlamayacayıq. Professional vizajist olaraq mən təəssüf hissi keçirirəm: gənc vizajistlər, çox güman ki, parlaq kağız üzərində karyera qura bilməyəcəklər. Çünki artıq photoshop var: axı indi çox şey postproduction vasitəsilə həyata keçir. Qorxuram ki, ümumiyyətlə, vizajistlərə ehtiyac qalmasın...

Bir qadın - 100 sima

Françeska,  Herb Rittsdən tutmuş Helmut Nyutona qədər bir çox məşhur fotoqraflarla işləməyə müvəffəq olub. Lakin onların arasında xüsusi biri var ki, onu bir kəlmədən anlayır – bu, onun həyat yoldaşı Alberto Tolotdur. Alberto ilə Françeskanın münasibətləri - ideal birliyin nümunəsidir.

- Biz nəinki bir-birimizi başa düşürük, hətta eyni xəyalı bölüşürük. Bəzən bizim heç məsləhətləşməyimizə ehtiyac qalmır. Mən əvvəlcədən bilirəm ki, o, makiyajın bu və ya digər görünüşünü hansı rakursdan çəkməyi planlaşdırır ...

2014-cü ildə onların ortaq körpəsi dünyaya gəldi - One Woman 100 Faces bestseller kitabı. Bu kitabda, Françeskanın iyirmi illik professional fəaliyyəti ərzində ən məşhur işləri yer alıb. Kitabının ön sözündə, onillik əməkdaşlıq etdiyi pop-diva Beyonce Françeskanı günümüzün ən qeyri-adi vizajisti adlandırır.

 

MƏTN LEYLA İMANOVA FOTO PRESS-MATERİALLAR