Biz sizə 2018-ci ilin ikinci yarısında keçiriləcək dünyanın ən parlaq festivallarına kiçik bir ekskursiya təklif edirik. Çatmaq olar, buraxmaq olmaz!
Tomorrowland
Harada: Bum, Belçika
Nə vaxt: 27-29 iyul
Bu musiqi festivalının bütün ərazisi nağıl kimi sürrealistik tərzdə tərtib edilmişdir. Hər il yeni bir mövzu seçilir və bu mövzuya əsasən dəlisov rəssamın fantaziyasına bənzəyən səhnə dekorasiyası hazırlanır. Elektron musiqi, möhtəşəm atəşfəşanlıq və işıq şousu – sizi bunlar gözləyir.
Fuji Rock
Harada: Yuzava, Yaponiya
Nə vaxt: 27-31 iyul
Yaponiyada hər il yüz minlərlə ziyarətçisi olan ən böyük rok-festival. Dağların və şam meşələrinin arasında səhnələr, atraksionlar və kempinqlər qurulur. Xoş olanı faydalı olanla birləşdirməyə tələsin: sevimli musiqi və təbiət qoynunda istirahət.
Boryeong Mud Festival
Harada: Poryon, Cənubi Koreya
Nə vaxt: 20-29 iyul
Bu festivalda palçıq – proqramın əsas elementidir, sözün əsl mənasında. Burada rəqs edirlər, yarışlar təşkil edirlər, heykəllər düzəldirlər, müalicə alırlar və əyləncəli şəkildə kirlənirlər.
Sziget
Harada: Budapeşt, Macarıstan
Nə vaxt: 8-15 avqust
Bu festivalı “Burning Man Europe” adlandırırlar. Burada hər il dünyanın ən məşhur qrupları çıxış edir, həmçinin qonaqlar film və teatr tamaşaları izləyə, yoqa, qayaya dırmanma ilə məşğul ola, instalyasiyaları və art-obyektləri izləyə bilərlər. Festival, yeri gəlmişkən, adada keçirilir. Ən əsas üstünlüyü isə - Bakıdan Macarıstana getmək çox asan və ucuzdur, ölkədə qiymətlər isə büdcəyə uyğundur.
Summerfest
Harada: Miluoki, ABŞ
Nə vaxt: 27 iyun – 8 iyul
50 illik tarixi olan festival! 11 gün, 11 səhnə, 800-dən çox çıxış, 900 mindən çox ziyarətçi. Summerfest - ən böyük amerikan festivalıdır. O, popdan roka, kantridən elektron musiqisinə - bütün musiqi tərzlərini özündə birləşdirir.
