İzmir uzun illərdir ziyarət etmək istədiyim şəhərlər sırasında idi və bu yaxınlarda Swissôtel Büyük Efes İzmir otelinin dəvəti sayəsində bu arzum gerçəkləşdi. Dörd gün ərzində təkcə şəhərin ən yaxşı otellərindən birinin qonaqpərvərliyi ilə tanış olmadım, həm də İzmiri fərqli tərəflərdən kəşf etdim: tarixi məhəllələrində gəzdim, Egey dənizi üzərində gün batımını seyr etdim, qədim Efes şəhərini ziyarət etdim və Urlanın sakit cazibəsini hiss etdim.
Bu səfər yeni bir istiqamətlə tanışlıqdan daha çox, tarixlə müasir həyatın ahəngdar şəkildə qovuşduğu bir şəhəri yaxından tanımaq imkanı oldu.
İzmirə gec saatlarda çatdığımız üçün şəhərlə əsl tanışlığımız ertəsi gün başladı. Növbəti səhər təşkilatçılar bizim üçün otelin geniş spa və hovuz imkanlarından, o cümlədən rahatlaşdırıcı masaj təcrübəsindən yararlanmağımız üçün bir neçə saat ayırmışdılar. Bu, səfərə mükəmməl bir başlanğıc oldu – bizə dincəlmək, uçuşun yaratdığı yorğunluğu aradan qaldırmaq və qarşıdakı günlərə rahat əhval-ruhiyyədə hazırlaşmaq imkanı verdi.
Eyni zamanda otelin kulinariya təklifləri ilə də tanış olduq. Café Swiss restoranında təqdim olunan səhər yeməyi həm çeşid, həm də keyfiyyət baxımından diqqət çəkirdi. Zəngin açıq bufedə türk və Avropa mətbəxinin nümunələri, təzə bişirilmiş xəmir məmulatları, mövsümi meyvələr və yerli pendirlərin geniş seçimi təqdim olunurdu.
Səfərin proqramından danışmazdan əvvəl otelin özü haqqında ayrıca söz açmağa dəyər. Swissôtel Büyük Efes İzmir şəhərin ən tanınmış otellərindən biridir. Məşhur Kordon sahil bulvarında yerləşən otel palma ağacları ilə əhatə olunub və Konak meydanı, Alsancak rayonu, eləcə də İzmirin əsas görməli yerlərindən bir neçəsinə piyada məsafəsindədir.
Otelin şəhərin mərkəzində yerləşməsinə baxmayaraq, burada hökm sürən ab-hava tamamilə fərqlidir. Geniş bağları, yüzillik ağacları və açıq hovuzu insanda sanki böyük bir şəhərin mərkəzində deyil, dənizkənarı kurortda istirahət etdiyi hissini yaradır.
Nahardan sonra bizim qrup üçün otel üzrə ekskursiya təşkil olundu. İnfrastrukturla yanaşı, otelin hər tərəfində nümayiş etdirilən zəngin incəsənət kolleksiyasına xüsusi diqqət ayrıldı. Tur zamanı öyrəndik ki, kolleksiyada Türkiyənin və dünyanın tanınmış rəssam və heykəltəraşlarına məxsus 800-dən çox sənət əsəri yer alır. Onların arasında Fernando Botero, Rabarama, Lorenzo Quinn və Antony Gormley kimi məşhur adlar da var. Bu səbəbdən hotelin dəhlizlərində gəzişmək sanki incəsənət qalereyasını ziyarət etmək təsiri bağışlayır. Hotelin sadəcə qonaqlama məkanı deyil, həm də özlüyündə mədəniyyət məkanı kimi fəaliyyət göstərməsi isə onu xüsusilə fərqləndirir.
Günün ikinci yarısında İzmiri kəşf etməyə yollandıq. İlk dayanacağımız şəhərin ən canlı və özünəməxsus atmosferə malik məhəllələrindən biri olan Alsancak oldu. Daha sonra Ayşe Mayda malikanəsini və Tarixi Lifti ziyarət etdik.
Səfərin ən yaddaqalan anlarından biri məhz burada yaşandı. Günəş üfüqə enməyə başlayarkən müşahidə meydançasına qalxdıq. Şəhər tədricən isti qızılı çalarlara bürünür, qarşımızda isə bütün əzəməti ilə İzmir körfəzi uzanırdı.
Günü yeni fəaliyyətə başlayan Comensa Steakhouse restoranında şam yeməyi ilə başa vurduq. Argentinalı şefin rəhbərlik etdiyi restoran yüksək keyfiyyətli ət seçimləri və klassik mətbəxə müasir yanaşması ilə seçilir. Səmimi və rahat atmosfer isə İzmirdə keçirdiyimiz ilk dolu gün ərzində yaşadıqlarımızı bölüşmək və təəssüratlarımızı müzakirə etmək üçün ideal şərait yaratdı.
Növbəti gün Türkiyənin ən qədim bazarlarından biri olan Kemeraltı bazarına baş çəkməklə başladı. Bura bir neçə saata tam kəşf ediləcək məkan deyil. Dar küçələri, kiçik sənətkarlıq emalatxanaları, ədviyyatlar və ənənəvi şirniyyatlarla dolu piştaxtaları, yerli ustaların əl işlərinin satıldığı dükanları əsl Şərq bazarının özünəməxsus ab-havasını yaradır.
Günün sonunda bizi Scappi italyan restoranında şam yeməyi gözləyirdi. Gün batımı fonunda təqdim olunan kokteyllər, gözəl mənzərə və tələsmədən keçirilən axşam yeməyi yeni kəşflərlə dolu günün ideal yekunu oldu.
Səfərin son günü isə ən dolğun proqramla yadda qaldı. Səhər Egey dənizi sahilində yerləşən, şərabçılıq ənənələri, mənzərəli küçələri və sakit həyat ritmi ilə məşhur olan Urla şəhərinə yollandıq.
Növbəti dayanacağımız Efes idi. Dünyanın ən böyük qədim şəhərlərindən birini ziyarət etmək özlüyündə unudulmaz təcrübədir. Lakin axşam saatlarında təşkil olunan ekskursiya bu təəssüratı daha da gücləndirdi. İşıqlandırılmış qədim küçələr, Cels kitabxanası və şəhərin xarabalıqları gün batdıqdan sonra tamamilə fərqli, demək olar ki, sehrli bir görkəm almışdı.
Səfərin sonunda anladım ki, Swissôtel Büyük Efes İzmir mənim üçün sadəcə qalmaq üçün bir otel olmayıb. Mərkəzi yerləşməsi şəhəri kəşf etmək üçün onu ideal başlanğıc nöqtəsinə çevirirdi, hər axşam isə onun sakit bağlarına qayıtmaq səfərin ayrılmaz hissəsinə çevrilmişdi. Hovuz kənarında istirahət etmək, zövqlə salınmış bağlarda gəzmək və hər detalda hiss olunan qayğı bu səyahəti həqiqətən də yaddaqalan etdi.
